TemposDixital

O encontro de Rolda Rebeldía en Compostela xuntou a movementos sociais, partidos e activistas. Un debate en marcha que provoca malestar na dirección do Bloque.

Escolma da entrevista concedida ao Secretario Xeral de Política Lingüística a TEMPOS NOVOS, e publicada no seu número 152, xa nos quioscos.

"O decreto do 2007 provocou unha reactividade moi importante e en maior ou menor medida propiciou o cambio electoral de 2009. Segundo, por primeira vez, neste decreto de 2009 váiselle pedir opinión, mediante a petición dun informe, ao Consello da Cultura Galega e á Real Academia Galega, cousa que nunca antes se fixera. "

"Hai claramente na sociedade galega un sentir maioritario favorable á promoción do galego, a que o galego teña un uso e unha presenza igualitaria respecto do castelán. Agora, o que esta sociedade non quere, creo, é que fagamos unha política lingüística que estabeleza obrigas máis aló do mínimo estrito necesario. Concretamente no ámbito do ensino non universitario, teño claro que a sociedade galega non quere un ensino maioritariamente en galego."

"Os datos da RAG son matizables en moitos sentidos. A mostra coa que se fixo o mapa do 2004 non é semellante nin comparable á mostra  de 1992. En calquera caso, a cuestión fundamental para min nestes momentos non é esa, senón estoutra: a sociedade galega está disposta a apoiar un modelo de ensino maioritariamente en galego e incluso cunha aposta cara á inmersión en galego? Se é que prefire un modelo máis ben equilibrado, unha segunda pregunta sería: é posible que o galego teña unha presenza digna, e incluso que se recupere a súa utilización en sectores claves da sociedade galega, estabelecendo este equilibrio no ensino e indo a políticas de promoción e de dinamización fóra do ámbito escolar? A miña resposta é si. Nas bases do decreto hai unha proposta de promoción da lingua galega a partir diso que agora chamamos equipos de dinamización da lingua galega. Vaise facer dinamización dende os centros."

"O modelo catalán foi exportado ou intentado exportar a moitas partes de España e do mundo. É un modelo interesante. Agora ben, detrás hai unha sociedade catalá maioritariamente favorable á inmersión lingüística, a unha discriminación positiva profunda cara ao catalán, a delegar nos poderes públicos a realización dunha política lingüística cun nivel regulador forte. De aí que os cataláns teñan dende o 98 unha lei de política lingüística tremendamente regulamentarista. "

"A proposta que nós facemos en infantil non consiste nun ensino monolingüe, senón plurilingüe. Deixando iso claro, este tipo de posibilidades excepcionais, como pode ser a segregación para favorecer o galego, haberá que estudalas. Non compete ao decreto, porque isto faise a través de ordes, pero é unha cuestión que se podería estudar."

"É que eu a estas alturas xa non teño moi claro que é a normalización, un concepto dos anos 60 con tal desgaste semántico que prefiro deixar para os especialistas, para facer congresos e para escribir artigos en revistas especializadas. Dende a acción política prefiro falar de dinamización, de promoción, de fomento, de activación, de utilización real da lingua. Non de algo que ao final xa non sabemos moi ben o que é."